Начало обычное: Царю Небесный, Трисвятое. По Отче наш: Господи, помилуй. (12 раз) Приидите, поклонимся... (Трижды)
Псалом 3
Господи, что ся умножиша стужающии ми? Мнози востают на мя, мнози глаголют души моей: несть спасения ему в Бозе его. Ты же, Господи, Заступник мой еси, слава моя и возносяй главу мою. Гласом моим ко Господу воззвах, и услыша мя от горы святыя Своея. Аз уснух, и спах, востах, яко Господь заступит мя. Не убоюся от тем людей, окрест нападающих на мя. Воскресни, Господи, спаси мя, Боже мой, яко Ты поразил еси вся враждующыя ми всуе; зубы грешников сокрушил еси. Господне есть спасение и на людех Твоих благословение Твое.
Молитва 1
Владыко Господи Боже мой, Егоже в руках жребий мой, заступи мя по милости Твоей, и не остави мя погибнути со беззаконии моими, ниже воли последовати похотствующия плоти на дух. Создание Твое есмь, не презри дело руку Твоею, не отвратися, ущедри, но не уничижи; не презри мя, Господи, яко немощен семь, яко к Тебе прибегох, покровителю моему Богу, исцели душу мою, яко согреши Тебе. Спаси мя ради милости Твоея, яко к Тебе привержен есмь от юности моея: да посрамятся ищущии отринути от Тебе, деяньми нечистыми, помышленьми нелепыми, воспоминаньми неполезными. Отгони от меня всякую скверну, злобы излишество: яко Ты еси Един Свят, Един Крепкий, Един Безсмертный, во всех имеяй могущество безприкладное, и Тобою дается всем, яже на диавола и его воинства, крепость.
Яко подобает Тебе всякая слава, честь и поклонение, Отцу и Сыну и Святому Духу, ныне и присио и во веки веков. Аминь.
Молитва 2
Да обратится болезнь твоя на главу твою, и на верх твой хула твоя да снидет, лукавый бесе и нечистный: аз бо Господу Богу моему кланяюся, и Того никогдаже похулю. Како бо ми возможно Сему досадити, или Его похулити, Егоже по вся дни и нощи, и часы славословлю, и покланяюся от всея души моея, и крепости, и мысли моея; но убо славословие мое есть, хула же твоя еси: ты узриши, о нихже нань клевещеши, и яко отступник на Бога глаголеши.
Молитва 3
Запрещает ти, вселукавый душе, диаволе, Господь, пришедый в мир Пречистою и Святою Девою, воистину Богородицею на спасение миру нас для грешных. Проклят еси ты и вся неприязнен¬ная твоя помышления, яже в нощи и во дни, заклинаю тя именем Единосущныя и Неразделимыя Троицы, Отца и Сына и Святаго Духа, отступи от мене, раба Божия (имя), не влагай в сердце мое помыслов неприязненных, но отыди в места пуста и безводна, идеже не присещает Господь. Заклинаю тя, нечистый и богохульный душе, именем Господа нашего Иисуса Христа, не блазнити, не смущати мя хульными помыслы, внегда сотворити ми молитвы моя ко Господу Богу моему, но да будут вся твоя хульная помышления на твою главу в День Судный: аз бо Господу Богу моему служу, и Тому Единому возсылаю молитву во дни и нощи, тебе упражняющу, мене же милующу, и ук-репляющу, и оставляющу ми за многую Его благость и милость вся прегрешения. Иди за мною, (от меня) сатано, и проклят буди ты Им, и вся неприязненная твоя и противная сила, яко да благословится и прославится пречестное имя Отца и Сына и Святаго Духа, ныне и присно и во веки веков. Аминь.
Молитва 4 ко Пресвятой Богородице
Пресвятая Владычице моя Богородице, святыми Твоими и всесильными мольбами отжени от мене, окаяннаго раба Твоего, уныние, забвение, неразумие, нерадение, и вся скверная, лукавая и хульная помышления, от окаяннаго ми сердца, от помраченнаго ума моего, и погаси пламень страстей моих, яко нищ и окаянен есмь, и избави мя от многих лютых воспоминаний и предприятий, и от всех действ злых свободи мя, яко благословенна еси от всех родов, и славится Пречестное имя Твое во веки. Аминь.
Честнейшую Херувим: Господи, помилуй. (Трижды.) Господи благослови, и отпуст.
Молитвы задержания
(из сборника молитв старца Пансофия Афонского, 1848 г.)
Сила сих молитв в утаении от слуха и взора людскаго, в тайнодействовании ея.
Яко неплодную смоковницу, не посецы мене, Спасе, грешнаго, но на многая лета пождание ми даруй, направляя душу слезами покаяния, да плод принесу Ти, Многомилостиве.*
Молитва задержания
Милосердный Господи! Ты некогда устами служителя Моисея, Иисуса, сына Навина, задерживал целый день движение солнца и луны, доколе народ Израильский мстил врагам своим.
Молитвой Елисея пророка некогда поразил сириян, задерживая их, и вновь исцелил их.
Ты некогда вещал пророку Исаии: вот, Я возвращу назад на десять ступеней солнечную тень, которая прошла по ступеням Ахазовым, и возвратилось солнце на десять ступеней по ступеням, по которым оно сходило.**
Ты некогда устами пророка Иезекииля затворил бездны, останавливал реки, задерживал воды.*
И Ты некогда постом и молитвою пророка Твоего Даниила заграждал уста львов во рву.**
И ныне задержи и замедли до благовремения все замыслы окрест стоящих мя о моем перемещении, увольнении, смещении, изгнании.
Так и ныне, разруши злые хотения и требования всех осуждающих мя, загради уста и сердца всех клевещущих, злобствующих и рыкающих на мя, и всех хулящих и унижающих мя.
Так и ныне, наведи духовную слепоту на глаза всех востающих на мя и на врагов моих.
Не Ты ли вещал апостолу Павлу: говори и не умолкай, ибо Я с тобою, и никто не сделает тебе зла.***
Смягчи сердца всех противоборствующих благу и достоинству Церкви Христовой. Посему да не умолкнут уста моя для обличения нечестивых и прославления праведных и всех дивных дел Твоих. И да исполнятся вся благая начинания наша и желания.
К вам, праведницы и молитвенницы Божии, наши дерзновенные предстателие, некогда силою своих молитв сдерживающие нашествие иноплеменников, подход ненавидящих, разрушившие злые замыслы людей, заграждавшие уста львов, ныне обращаюся с молитвой моей, с моим прошением.
И ты, преподобный великий Елий Египетский, некогда оградивший в круге крестным знамением место поселения ученика своего, повелел ему вооружиться именем Господним и не бояться отныне демонских искушений.* Огради дом мой, в коем я живу, в круге молитв твоих и сохрани его от огненного запаления, воровского нападения и всякого зла и страхования.
И ты, преподобный отче Поплие Сирийский, некогда своею непрестанною молитвою десять дней демона державший неподвижным и не могущим идти ни днем, ни ночью;** ныне окрест келии моей и дома (моего) сего удержи за оградою его вся сопротивныя силы и всех хулящих имя Божие и презирающих мя.
И ты, преподобная девственница Пиама, некогда силою молитвы остановившая движение шедших погубить жителей тоя деревни, где жила, ныне приостанови все замыслы врагов моих, хотящих изгнати мя из града сего и погубити мя: не допус¬кай им приближатися к дому сему, останови их силою молитвы своей: «Господи Судия Вселенной, Ты, Которому неугодна всякая неправда, когда приидет к Тебе молитва сия, пусть Святая Сила остановит их на том месте, где постигнет их».***
И ты, блаженный Лаврентие Калужский, моли Бога о мне, как имеющий дерзновение пред Господом предстательствовать о страждущих от козней диавольских. Моли Бога о мне, да оградит Он мя от козней сатанинских.
И ты, преподобный Василие Печерский, соверши свои молитвы запрещения над нападающими на мя и отжени все козни диавольские от мене.*
И вы, вси Святые земли Российстей, развейте силою молитв своих обо мне все бесовские чары, все диавольские замыслы и козни — досадити мне и погубити мя и достояние мое.
И ты, великий и грозный страже, Архистратиже Михаиле, огненным мечом посекаяй все хотения врага рода человеческаго и всех приспешников его, хотящих погубити мя. Стой нерушимо на страже дома сего, всех живущих в нем и всего достояния его.
И Ты, Владычице, не напрасно именуемая «Нерушимой стеной», буди для всех враждующих против меня и замышляющих пакостная творити мне, воистинну некоей преградой и нерушимой стеной, ограждающей мя от всякого зла и тяжких обстояний.
Молитва преподобного Макария Египетского
Господи, как Ты хочешь, и как знаешь — помилуй.**
Но да будет тако! Да будет тако! Да будет тако!***
Догматик, глас 1-й
Всемирную славу, от человек прозябшую и Владыку рождшую, небесную дверь, воспоим Марию Деву, безплотных песнь и верных удобрение; Сия бо явися небо и храм Божества; Сия, преграждение вражды разрушивши, мир введе и Царствие отверзе. Сию убо имуще веры утверждение, поборника имамы из Нея рождшагося Господа. Дерзайте убо, дерзайте, людие Божий, ибо Той победит враги, яко всесилен.
Небесным силам: Собор Архистратига Михаила и прочих Бесплотных сил
Тропарь, глас 4-й
Небесных воинств Архистратизи, молим вас присно мы недостойнии,.да вашими молитвами оградите нас кровом крил невещественныя вашея славы; сохраняюще нас припадающих прилежно и вопиющих: от бед избавите нас, яко чиноначальницы вышних сил.
Кондак, глас 2-й
Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко Безплотных Архистратизи.
Величание
Величаем вас, Архангели и Ангели, и вся воинства, Херувими и Серафими, славящия Господа.
О прогнании лукавых духов от людей и животных,
против вреда со стороны волшебников, от злых людей
Священно мученику Киприану Кондак
От художества волшебнаго обратився, Богомудре, к познанию Божественному, показался еси миру врач мудрейший, исцеления даруя чествующим тя, Киприане со Иустииою: с нею же молися Человеколюбцу Владыке спасту души наша.
Икос
Целений твоих, святе, дарования мне низпослав, и недугующее мое сердце гноем греховным молитвами твоими исцели, яко да слово пения от скверных устен моих ныне принесу ти и воспою болезни твоя, яже показал еси, священномучение, покаянием добрым, и блаженным, и Богу приближающимся. Того бо удержан рукою, направился еси, яко по лествице, к Небесным, непрестанно моляся спасти души наша.
Молитва
О, святей угодниче Божий, священномучениче Киприане, скорый помощниче и молитвиниче всем к тебе прибегающим. Приими от нас, недостойных, хваление наше, испроси нам у Господа Бога в немощах укрепление, в болезнях исцеление, в печалях утешение и всем вся полезная в жизни нашей. Вознеси ко Господу благомощную твою молитву, да оградит нас от падений греховных наших, да научит нас истинному покаянию, да избавит нас от пленения диавольского и всякого действия духов нечистых и избавит от обидящих нас. Буди нам крепкий облик на все враги видимые и невидимые. Во искушениях подаждь нам терпение и в час кончины нашея яви нам заступление от истязателей на воздушных мытарствах наших. Да водимые тобою достигнем горнего Иерусалима и сподобимся в Небесном Царствии со всеми святыми славити и воспевати Пресвятое имя Отца и Сына и Святаго Духа во веки веков. Аминь.
Священно мученику Киприану и мученице Иустине
О, святие священномучениче Киприане и мученице Иустина! Внемлите смиренному молению нашему. Аще бо временное житие ваше мученически за Христа скончали есте, но духом от нас не отступаете есте, присно по заповедем Господним шествовати нас научающе и крест свой терпеливо нести нам пособствующе. Се, дерзновение ко Христу Богу и Пречистей Его Матери стяжали есте. Темже и ныне будите молитвенницы и ходатаи о нас недостойных (имена). Будите нам заступницы крепции, да заступлепием вашим сохраняеми невредимы от бесов, волхвов и от человек злых пребудем, славяще Святую Троицу, Отца и Сына и Святаго Духа, ныне и присно и во веки веков. Аминь.
Псалом 67
Да воскреснет Бог, и расточатся врази Его, и да бежат от лица Его ненавидящии Его. Яко исчезает дым, да исчезнут, яко тает воск от лица огня, тако да погибнут грешницы от лица Божия, а праведницы да возвеселятся, да возрадуются пред Богом, да насладятся в веселии. Воспойте Богу, пойте имени Его, путесотворите возшедшему на запады, Господь имя Ему, и радуйтеся пред Ним. Да смятутся от лица Его, Отца сирых и Судий вдовиц: Бог в месте святем Своем. Бог вселяет единомысленныя в дом, изводя окованныя мужеством, такожде преогорчевающыя живущыя во гробех. Боже, внегда исходити Тебе пред людьми Твоими, внегда мимоходити Тебе в пустыни, земля потрясеся, ибо небеса кануша от лица Бога Синаина, от лица Бога Израилева. Дождь волен отлучиши, Боже, достоянию Твоему и изнеможе, Ты же совершил еси е. Животная Твоя живут на ней, уготовал еси благостию Твоею нищему, Боже. Господь даст глагол благовествующым силою многою. Царь сил возлюбленнаго, красотою дому разделити корысти. Аще поспите посреде предел, криле голубине посребрене, и междорамия ея в блещании злата. Внегда разнствит Небесный цари на ней, оснежатся в Селмоне. Гора Божия, гора тучная, гора усыренная, гора тучная. Вскую непщуете горы усыренныя? Гора, юже благоволи Бог жити в ней, ибо Господь вселится до конца. Колесница Божия тмами тем, тысящя гобзующих, Господь в них в Синаи во святем. Возшел еси на высоту, пленил еси плен, приял еси даяния в человецех, ибо не покаряющыяся, еже вселитися. Господь Бог благословен, благословен Господь день дне, поспешит нам Бог спасений наших, Бог наш, Бог еже спасати, и Господня, Господня исходища смертная. Обаче Бог сокрушит главы врагов Своих, верх влас преходящих в прегрешениих своих. Рече Господь: от Васана обращу, обращу во глубинах морских. Яко да омочится нога твоя в крови, язык пес твоих, от враг от него. Видена быша шествия Твоя, Боже, шествия Бога моего Царя, иже во святем, предвариша князи близ поющих, посреде дев тимпанниц. В церквах благословите Бога, Господа от источник Израилевых. Тамо Вениамин юнейший во ужасе, князи Иудовы владыки их, князи Завулони, князи Неффалимли. Заповеждь, Боже, силою Твоею, укрепи, Боже, сие, еже соделал еси в нас. От храма Твоего во Иерусалим Тебе принесут царие дары. Запрети зверем тростным, сонм юнец в юницах людских, еже затворити искушенныя сребром, расточи языки хотящыя бранем. Прийдут молитвенницы от Египта, Ефиопиа предварит руку свою к Богу. Царства земная, пойте Богу, воспойте Господери, возшедшему на Небо небесе на востоки, се даст гласу Своему глас силы. Дадите славу Богови, на Израили велелепота Его, и сила Его на облацех. Дивен Бог во святых Своих, Бог Израилев: Той даст силу и державу людем Своим, благословен Бог.
Псалюм 90 (см. с. 304)
Псалом 102
Благослови, душе моя, Господа, и вся внутренняя моя имя святое Его. Благослови, душе моя, Господа, и не забвывай всех воздаяний Его, очищающаго вся беззакония твоя, исцеляющаго вся недуги твоя, избавляющаго от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Творяй милостыни Господь, и судьбу всем обидимым. Сказа пути Своя Моисеови, сыновом Израилевым хотения Своя. Щедр и Милостив Господь, Долготерпелив и Многомилостив. Не до конца прогневается, ниже во век враждует, не по беззаконием нашым сотворил есть нам, ниже по грехом нашым воздал есть нам. Яко по высоте небесней от земли, утвердил есть Господь милость Свою на боящихся Его. Елико отстоят востоцы от запад, удалил есть от нас беззакония наша. Якоже щедрит отец сыны, ущедри Господь боящихся Его. Яко той позна создание наше, помяну, яко персть есмы. Человек, яко трава дние его, яко цвет сельный, тако оцветет, яко дух пройде в нем, и не будет, и не познает ктому места своего. Милость же Господня от века и до века на боящихся Его, и правда Его на сынех сынов, хранящих завет Его, и помнящих заповеди Его творити я. Господь на Небеси уготова Престол Свой, и Царство Его всеми обладает. Благословите Господа вси Ангели Его, сильнии крепостию, творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычества Его, благослови, душе моя, Господа.
Псалом 126
Аще не Господь созиждет дом, всуе трудишася зиждущии. Аще не Господь сохранит град, всуе бде стрегий. Всуе вам есть утреневати, востанете по седении, ядущии хлеб болезни, егда даст возлюбленным Своим сон. Се достояние Господне сынове, мзда плода чревняго. Яко стрелы в руце сильнаго, тако сынове оттрясенных. Блажен, иже исполнит желание свое от них. Не постыдятся, егда глаголют врагом своим во вратех.
Также рекомендуется читать вечернюю молитву «Да воскреснет Бог...» и целиком 4-ю кафизму, поминая на каждой «Славе... >> имя страждущего.
Святому мученику Трифону
О, святый мучениче Христов Трифоне, услыши ныне и на всякий час моление нас, раб Божиих (имена), и предстательствуй о нас пред Господем. Ты некогда дщерь цареву, во граде Риме от диавола мучиму, исцелил еси: сице и нас от лютых его козней сохрани во вся дни жития нашего, наипаче же в день последняго нашего издыхания предстательствуй о нас. Моли Господа, да сподобит и нас причастники быти присносущнаго веселия и радости, да с тобою купно удостоимся славити Отца и Сына и Святаго Утешителя Духа во веки веков. Аминь.
Преподобно мученику Корнилцю Псково-Печерскому
О, святый преподобномучениче Корнилие! Призри милостивно на скорби наша душевныя и телесныя, и избаву нам подаждь; помози нам, рабам Божиим (имена), святче Божий, избавитися от навета злых человек, от нихже и сам ты невинно на земли пострадал еси; защити нас от насилия диавола, люте на нас воюющаго. Умоли Господа Бога и Пречистую Его Матерь даровати нам тихое и безгрешное житие, братскую нелицемерную любовь и мирную христианскую кончину, да чистою совестию предстанем нелицеприятному страшному судилищу Христову и во Царствии Его прославим живоначальную Троицу, Отца и Сына и Святаго Духа, во веки веков. Аминь.
Святому праведному Иоанну, Русскому Исповеднику
О, святый новоявленный угодниче Божий, Иоанне Русский! Подвигом добрым подвизаяся на земли, восприял еси на небесех венец правды, еже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстояй престолу Божию, приими моления наша, раб Божиих (имена), и ко Всемилостивому Богу принеси, о еже простити нам всякое прегрешение и помощи нам стати противу козней диавольских, да избавльшеся от скорбей, болезней, бед и напастей, и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во Святых Своих славимаго Бога, Отца и Сына и Святаго Духа, ныне и присно и во веки веков. Аминь.
Молитва Святым угодникам:
Иоанну Крестителю, Иоанну Богослову, Николаю Чудотворцу, священно мученику Харалампию, великомученику Георгию Победоносцу, Феодору Тирону, пророку Илие, святителю Никите Новгородскому, мученику Иоанну Воину, великомученице Варваре, великомученице Екатерине, преподобному Антонию Великому
О, великие Христовы угодницы и чудотворцы: святый Предтече и крестителю Христов Иоанне, святый всехвальный апостоле и наперсниче Христов Иоанне, святителю отче Николае, священно-мучениче Харалампие, великомучениче Георгие Победоносче, отче Феодоре, пророче Божий Илие, святителю Никите, мучениче Иоанне Воине, великомученице Варваро, великомученице Екатерино, преподобный отче Антоние! Услышите нас, вам молящихся, раб Божиих (имена). Вы весте наши скорби и недуги, слышите воздыхания множества к вам притекающих. Сего ради к вам яко скорым помощникам и теплым молитвенникам нашим зовем: не оставляйте нас (имена) вашим у Бога ходатайством. Мы присно заблуждаем от пути спасения, руководите нас, милостивые наставницы. Мы немощны есмы в вере, утвердите нас, правоверия учители. Мы зело убози сотворихомся добрых дел, обогатите нас, благосердия сокровища. Мы присно наветуеми есмы от враг видимых и невидимых и озлобляеми, помозите нам, безпомощных заступницы. Гнев праведный, движимый на ны за беззакония наша, отвратите от нас вашим хода¬тайством у престола Судии Бога, Емуже вы предстоите на небеси, святые праведницы. Услышите, молим вас, велиции Христовы угодницы, нас с верою призывающия и испросите молитвами вашими у Отца Небесцаго всем нам прощение грехов наших и от бед избавление. Вы 6о помощницы, заступницы и молитвенницы наши, и о вас славу возсылаем Отцу и Сыну и Святому Духу, ныне и присно и во веки веков. Аминь.
Преподобной Марии Египетской
О, великая Христова угодница, преподобная мати Марие! Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находящия напасти, от внезапныя смерти и от всякого зла, в час же разлучения души и тела отжени, святая угодница, всякую лукавую мысль и лукавые бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение со Отцем и Святым Духом во веки веков. Аминь.
Об исцелении бесноватых и страждущих от нечистых духов молятся перед иконами Божией Матери Свенско-Печерской, Владимиро-Оранской, Коневской и «Избавительницей».
Также читают акафисты: святому мученику Трифону, святителю Тихону Воронежскому, святому архангелу Михаилу.
От мысленных бесовских искушений. Преподобному Серафиму Саровскому
О, великий угодниче Божий, преподобне и Богоносне отче наш Серафиме! Призри от горения славы на нас, смиренных и немощных, и обремененных грехми многими, твоея помощи и утеше¬ния просящих: приникни к нам благосердием твоим и помози нам заповеди Господни непорочно сохраняти, веру православную крепко содержати, покаяние во гресех наших усердно Богу приносити, во благочестии христианстем благодатно преуспевати и достойны быти твоего о нас молитвенного к Богу предстательства: ей, святче Божий, услыши нас, молящих тебе с верою и любовию, и не презри нас, требующих твоего заступления: ныне и в час кончины нашея помози нам, и заступи нас молитвами твоими от злобных наветов диавольских, да не обладает нами тех сила, но да сподобимся помощию твоею наследовати блаженство обители райския: на тя бо упование наше ныне возлагаем, отче благосердный: буди нам воистинну ко спасению путевождь и приведи нас к невечернему свету жизни вечныя богоприятным предстательством твоим у престола Пресвятыя Троицы, да славим и поем со всеми святыми достопоклоняемое имя Отца и Сына и Святаго Духа во веки веков. Аминь.
При блудных помыслах и плотской страсти.
Святителю Евфимию, архиепископу Новгородскому, чудотворцу
Отче святителю Евфимие! Ты от юности твоея Христа возлюбил еси и благодатию Его укрепляем, вся плотская мудрования умертвил еси, чистым житием и кротким нравом угодил еси Господеви, и по благодати Его на престоле святительства подвизался, явился еси пастве Христове Великаго Новаграда пастырь добрый, полагаяй душу твою о стаде твоем. Темже и по смерти твоей прослави тя Пастыреначальник Христос подаянием чудес, от тебе истекающих, образ добродетельнаго жития и теплаго молитвенника в Тебе нам показуя. Темже и аз, грешный и унылый, к раце мощей Твоих припадая, молюся тебе усердно: даждь ми руку помощи, воздвигни мя молитвами твоими из глубины греховныя, се бо волнами страстей плотских и уныния, и иными тьмочисленными житейскими треволнении обуреваюся и погибаю. Буди убо мне, многогрешному, теплый ко Христу предстатель и молитвенник, да и аз, от потопления греховнаго избавлен, ко пристанищу непорочнаго жития благодатию Христовою достигну, и чистым житием прославлю Спасителя моего, кровию Своею мене искупившаго:и тако житие скончав, получу живот вечный во Царствии Небеснем, идеже славится пречестное и великолепое Имя Отца и Сына и Святаго Духа, ныне и присно и во веки веков. Аминь.
Также молятся преподобной Марии Египетской (см. с. 397), святой мученице Фомаиде (см. с. 291).
Во время брани плотской.
Молитва (старца Макария Оптинского)
О, Мати Господа моего Творца, Ты корень девства и неувядаемый цвет чистоты. О, Богородительнице! Ты ми помози, немощному плотскою страстью и болезненну сущу, едино бо Твое, и с Тобою Твоего Сына и Бога имею застулление. Аминь.
Иная молитва
Предложение твое, враже, на главу твою. Мати Божия, помози ми. (И читать много раз «Богородице Дево, радуйся».)
Правило от осквернения
Когда случится кому искуситься во сне по действу диавола, встав, твори поклоны, глаголя:
Боже, милостив буди мне грешному. Затем начало обычное, по Приидите, поклонимся: Помилуй мя, Боже (см. с.6)
И тропари, глас 7-й
Пастырю добрый, душу Твою положивый о нас, сведый сокровенная, содеянная мною, Едине Блаже, упаси мя разумом заблуждшаго, и исхити мя от волка, Агнче Божий, и помилуй мя.
Отягчен сном уныния, помрачаюся прелестию греховною: но даруй ми утро покаяния, просвещая очи мысленныя, Христе Боже, просвещение души моея, и спаси мя.
Мглою греховною и сластьми житейскими сплетаем ум окаянныя души моея, страсти различныя раждает, и в помысл умиления не приходит. Но ущедри, Спасе, смирение мое, и даждь ми помысл умиления, да и аз спасаем прежде конца воззову благоутробию Твоему: Господи Христе Спасе мой, отчаяннаго спаси мя и недостойнаго.
Яко впадый в разбойники, и уязвен, тако и аз впадох во многия грехи, и уязвена ми есть душа. К кому прибегну повинный аз: токмо к Тебе милосердому душ врачу: излей на мя, Боже, великую Твою милость.
Слава: Яко блудный сын, приидох и аз Щедре: приими мя, Отче, возвращаюшася, яко единаго от наемник Твоих, Боже, и помилуй мя.
И ныне: Богородичен:
Избави, Богородице, от обдержащих нас грехов: яко иного упования вернии не имамы, разве Тебе, и от Тебе рождшагося Господа.
Господи помилуй (40 раз) Затем 8 поклонов с молитвой:
Боже, милостив ми буди, и прости мя блуднаго за имя Твое святое.
Молитва 1, святого Василия Великого
Паки запят бых окаянный умом и лукавым обычаем, работая греху. Паки князь тьмы и страстных сладостей родитель, пленена мя сотвори, и якоже раба смиреннаго, того хотением, и желанием плотским работати принуждает мя. И что сотворю, Господи мой, и Избавителю, и Заступниче уповающим на Тя, аще не к Тебе паки возращуся и постеню, и милости испрошу о содеянных мною; но боюся и трепещу, да не како всегда исповедаяся, и отступите злых обещаваяся, и на кийждо час согрешая: и не воздав молитвы моея Тебе Богу моему, долготерпение Твое воздвигну к негодованию. И кто стерпит гнева Твоего, Господи; ведый убо множество щедрот Твоих, и пучину человеколюбия Твоего, паки возверзаю себе на милость Твою, и взываю Ти: еже согреших, прости. Помилуй мя падшаго, даждь ми руку помощи, в тине сластей погруженному. Не остави, Господи, создание Твое растлитися беззаконьми моими и грехи моими: но обычным Твоим милосердием и благостию принуждаем, избави от кала и скверны телесныя и страстных помышлений, оскверняющих всегда душу мою окаянную: се бо, Господи; якоже зриши, несть в ней места чиста, но вся проказися, и все тело объят язва. Сам убо, Человеколюбче, врачу душ и телес и милости источниче, очисти ту слез моих течением, сих изливая на мя обильно: излей на мя человеколюбие Твое, и даждь ми исцеление и очищение, и исцели сокрушение мое, и не отврати лица Твоего от мене, да не якоже вещь пояст мя отчаяния огнь: но якоже рекл еси, неложный Боже, яко велия радость бывает на небеси о едином грешнице кающемся, сие сотвори и на мне грешнем, и не затвори ушию благоутробия Твоего, в молитве покаяния моего; но отверзи их, и яко кадило исправи ту пред Тобою: веси бо немощь естества, Создателю, и удобь поползновение юности, и тяжесть тела, и презираеши грехи, и покаяние приемлеши призывающих Тя истиною. Яко благословися и прославися пречестное и великолепое имя Твое, Отца и Сына и Святаго Духа, ныне и присно и во веки веков. Аминь.
Молитва 2, его же
Многомилостиве, нетление, нескверне, безгрешне Господи, очисти мя непотребнаго раба Твоего, от всякия скверны плотскйя и душевныя, и от невнимания, и уныния моего прибывшую ми нечистоту, со йнеми беззаконии моими, и яви мя нескверна, Владыко, за благость Христа Твоего и освяти мя нашествием Пресвятаго Твоего Духа:
яко да возбнув от мглы нечистых привидений диавольских, и всякия скверны, сподоблюся чистою совестию отверсти скверная моя и нечистая уста, и воспевати всесвятое имя Твое, Отца и Сына и Святаго Духа, ныне и присно и во веки веков. Аминь.
Затем Честнейшую Херувим... Слава: И ныне: Господи помилуй (Трижды) Господи, благослови.
И отпуст
Господи Иисусе Христе Боже наш, молитв ради Пречистая Твоея Матере, и всех святых, спаси мя грешнаго.
Молитва от осквернения
Господи Боже наш, Едине Благий и Человеколюбче, Едине Святый и во святых почиваяй, Иже верховному Твоему апостолу Петру явивый видением, ничтоже скверно, или нечисто мнети, от Тебе сотворенных на пищу и в наслаждение человеком, и сосудом Твоим избранным, апостолом Павлом вся чиста чистым заповедавый: Ты Сам, Владыко Пресвятый, призыванием страшнаго и пречистаго Твоего имене, и знамением Честнаго и Животворящаго Креста, благослови и очисти мя, раба Твоего (имя) осквернившагося от всякаго неприязненнаго духа, от всякаго мечтания и гада ядовитаго, от всякаго беззакония и от всякия лести, от всякаго потвора и от всякия суеты, и от всякаго недуга, и всякия язи, и от всякаго противнаго злодейства диаволя. И ныне недостойнаго мене раба Твоего (имя) сподоби по Твоему милосердию служити пречистым Твоим Тайнам. И прежде очисти ми душу и тело от всякия скверны, и остави всякое прегрешение, вольное и невольное, еже согреших во вся дни живота моего, делом, словом и помышлением, во дни и в нощи, и до нынешняго часа. И даждь ми, Господи, служение сие страшное небесных Чинов, и причастие Пречистых Твоих Тайн, не в суд, ни во осуждение, но в прощение грехов, и в Духа Святаго пришествие, и живот присносущныя радости, егоже уготовал еси истинным Твоим служебником. Сохрани мя, Владыко Всесильне, от всякаго греха и злобы, соблюди нескверна и непорочна от всякия проказы противнаго диавола; и даждь ми, Господи, служити Тебе в преподобии и правде до последняго дне и часа и скончания моего: Ты бо еси благославляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.
|